Luke 14

UJesu Endlini YomFarisi

1Ngelinye iSabatha uJesu wayakudla endlini yomFarisi owayesaziwa kakhulu, khonapho bemnanzelela kakhulu. 2Phambi kwakhe khonapho kwakulendoda eyayilesifo sikambizankulu, esivuvukisa izitho.

3UJesu wasebuza abaFarisi lezazi zomthetho wathi, “Kusemthethweni yini kumbe hatshi ukusilisa ngosuku lweSabatha na?” 4Kodwa bathula. Yikho waseyibamba indoda leyo wayisilisa wathi kayihambe.

5Wasebabuza wathi, “Nxa omunye wenu elendodana loba inkabi iwele emgodini ngeSabatha, kawuyikuphanga uyikhuphe masinyane na?” 6Baswela ukuthi bathini.

7Wananzelela ukuthi izethekeli zazikhetha izindawo eziqakathekileyo etafuleni wasebatshela umzekeliso lo:

8“Nxa omunye ekunxusa edilini lomthimba, ungaze wathatha indawo eqakathekileyo, funa kunxuswe umuntu omkhulu kulawe. 9Nxa kunjalo umalinxusa uzakuza athi kuwe, ‘Ake uxekele lo omunye isihlalo sakho.’ Uzabe usuyangekile ususiyahlala endaweni ephansi kakhulu. 10Kodwa uma unxusiwe, hlala endaweni ephansi kakhulu, ukuze kuthi nxa umakunxusa efika kuwe uzakuthi, ‘Mngane, suka uye endaweni engcono.’ Lapho-ke uzabe uphakanyisiwe phambi kwabo bonke abanxuswe kanye lawe. 11Ngoba wonke umuntu oziphakamisayo uzakwehliswa, kuthi lowo ozehlisayo uzaphakanyiswa.”

12UJesu wasesithi kumamnxusa, ‘Nxa usenza idili emini loba kusihlwa unganxusi abangane bakho, loba abafowenu kumbe izihlobo kumbe omakhelwana abanothileyo; ungenza njalo labo bangakunxusa, kuthi-ke lawe usuwenanisiwe.

13Kodwa nxa usenza idili, nxusa abayanga, izilima, izigoga, iziphofu, 14lapho uzabusiswa. Loba bengasoze bakwenanise lawe, uzakwenaniswa ekuvukeni kwabalungileyo.”

Umzekeliso Wedili Elikhulu

15Kwathi omunye walabo abahlezi etafuleni laye esekuzwile lokhu, wathi kuJesu, “Ubusisiwe lowomuntu ozakudla edilini embusweni kaNkulunkulu.”

16UJesu waphendula wathi, “Umuntu othile wenza idili elikhulu wabiza abantu abanengi.

17Sekuyisikhathi sedili wathuma isisebenzi sakhe ukutshela ababebiziwe ukuthi, ‘Wozani, konke sekulungile.

18“Kodwa bonke baqala ukuxolisa. Owokuqala wathi, ‘Ngisanda kuthenga isivande, pho kusamele ngiyosibona. Ake ungixolisele.’

19“Omunye wathi, ‘Khathesi nje ngisanda kuthenga izinkabi zamajogwe amahlanu, ungifica ngivele sengisendleleni yokuthi kengiyozizama. Ake ungixolisele.’

20“Njalo omunye wathi, ‘Ngisanda kutshada nje khathesi, yikho ngingeke ngize.’

21“Isisebenzi sabuya sakubika konke lokhu kumnumzana. Wazonda wafa umnumzana waselaya isisebenzi sakhe wathi, ‘Hamba khathesi, uye ezitaladini lemikotweni yedolobho umeme abayanga, izilima, iziphofu lemiqhuge.’

22“Isisebenzi sathi, ‘Mnumzana, lokho okuyalileyo sekwenziwe, kodwa indawo isekhona.’

23Umnumzana wasetshela isisebenzi wathi, ‘Hamba uye emigwaqweni lasezindleleni zemaphandleni uze labo ukuze indlu yami igcwale. 24Ngiyalitshela kakho loyedwa walabo bantu ababemenyiwe ozalihotsha idili lami.’ ”

Umvuzo Wokuba Ngumfundi

25Abantu abanengi babehamba loJesu, wasephendukela kubo wathi:

26“Nxa umuntu esiza kimi kodwa angaze azonda uyise lonina, umkakhe labantwana, abafowabo labodadewabo – yebo, kanye lempilo yakhe – ngeke abe ngumfundi wami. 27Lowo ongathwali isiphambano sakhe angilandele ngeke abe ngumfundi wami.

28“Ake kuthi omunye wenu afune ukwakha umphotshongo. Kambe kazukuqala ahlale phansi abalise indleko ukuze abone ingabe ulayo yini imali yokuwuqeda na? 29Phela angakha isisekelo kodwa ehluleke ukuqeda, wonke obonayo uzamhleka, 30esithi, ‘Indoda le yaqalisa ukwakha kodwa yehluleka ukuqeda.’

31“Kumbe ake kuthi inkosi ilungisela ukuya empini isilwa lenye inkosi. Kayizukuqala ihlale phansi yini ihluzisise engqondweni ingabe yona ngamabutho ayo azinkulungwane ezilitshumi ingaqondana laleyo elezinkulungwane ezingamatshumi amabili na? 32Aluba ingeke yema, izathuma amanxusa leyana isekude icele uxolo.

33Ngaleyondlela, loba ngubani phakathi kwenu ongadeli konke alakho ngeke abe ngumfundi wami.

34“Itshwayi lilungile, kodwa lingadumala, lingavuselelwa kanjani na? 35Kaliwulungelanga lomhlabathi loba inqumbi yomvundiso; liyalahlwa. “Lowo olezindlebe zokuzwa, kezwe.”